Kvinner sparar som aldri før

Det er fleire måtar å spare på; på sparekonto eller igjennom fond eller aksjar. Historisk sett har trenden vore at kvinner har spart mest på konto, medan menn i høgare grad har spart i fond og aksjar.

Dei siste åra har Sparebanken Sogn og Fjordane registrert ein endring i dette.

Frå januar 2021 til januar 2023 auka kvinner fondssparinga si med 46 prosent, medan menn auka med 31 prosent i same periode.

Dette er ein viktig del av likestillingskampen, meiner direktør for privatmarknad Linda Vøllestad Westbye.

– Det at vi kvinner tar ansvar for vår eigen sjølvstendige økonomi er viktig. Sjølv om kvinner framleis i snitt tener mindre enn menn, er det svært viktig at vi som kvinner tar aktive grep for å sikre ein sjølvstendig økonomi no og i framtida. Det at vi sparar aktivt vitnar om ei bevisst forhold til sin eigen økonomisk situasjon, seier ho.

I tillegg til talet kundar med fondskonto, har Sparebanken Sogn og Fjordane sett på talet kundar med spareavtale i fond. Ein spareavtale er ein fast sum som blir spart kvar månad.

Også her har kvinnelege kundar gjort framsteg. I løpet av dei siste to åra har kvinner oppretta nesten dobbelt så mange spareavtalar enn menn. Det er færre mannlege kundar som har fondskonto, men dei har i sum tent opp meir på konto enn kvinnene har.

Det mest vanlege sparebeløpet for kvinner er 1000 kroner i månaden, medan gjennomsnittet ligg på 1900 kroner i månaden.

Vøllestad Westbye rår alle til å spare, enten det er på sparekonto eller i fond.

– Å spare litt er betre enn ingenting. Start smått og set opp eit fast trekk i månaden, og så kan du enkelt auke opp i mobilbanken om du får høve. Det viktigaste er å tenke langsiktig. Pengar du sparar i dag kan du bruke på det du drøymer om i framtida.

Har du spørsmål om sparing må du ikkje nøle med å kontakte kunderådgjevaren din eller kundesenteret vårt.