Her er det første skiltet på plass

Sparebanken Sogn og Fjordane blir SpareBank 1 Sogn og Fjordane den 4. november. I samband med dette skal alle kontora til banken i Sogn og Fjordane og Bergen få nye skilt på bygga sine.

Både produksjonen og montering av skilta er det ei lokal bedrift som skal stå for, nemleg Fluor-Lux i Stryn. Monteringsjobben er allereie i gong, og måndag 7. oktober vart det første skiltet hengt opp.

Sjølvsagt var Stryn først ut.

– Dette blei kjempeflott! Veldig kjekt at den nye logoen no er komen på veggen, og for oss i Stryn er det jo sjølvsagt stas at det vart ei bedrift herifrå som fekk denne jobben, seier Odd Kjetil Tonning, banksjef på privatmarknaden i Stryn.

Dagleg leiar i Fluor-Lux, Oddmund Kjøsnes, set pris på jobben dei har fått.

– Vi er veldig glade og stolte over å bli valt ut av banken, og at vi no får moglegheita til å levere skilt i eigen teig, seier Kjøsnes.

Kjøsnes fortel vidare at ein intensiv skilt-turne no ventar i Sogn og Fjordane og Bergen. Med på denne turneen vert også Stryn Vaktmesterservice. Målet er å vere ferdig i midten av oktober med alle utvendige skilt, og i tillegg er det også andre ting som skal gjerast innvendig fram mot 4. november.

– Vi har 2-3 personar hos som skal reise rundt. I tillegg samarbeider vi med lokale elektrikarar på dei ulike plassane. Eg må seie at alle desse er utruleg hyggeleg å ha med og gjere, så vi ser fram til å gjere denne jobben saman med dei, seier Kjøsnes.

Kommunikasjonsdirektør i banken, Johanne Viken Sandnes, er veldig fornøgd med at Fluor-Lux takka ja til oppdraget.

– Vi har berre gode erfaringar med Fluor-Lux og ser fram til at dei skal gjere denne store jobben for oss. Vi er glade for at dei set i gong skiltbyta i god tid, så bygga våre står klar i ny drakt når vi blir klare til det offisielle startskotet som SpareBank 1 Sogn og Fjordane i november, seier Sandnes.